Regional Peace and Order Council

Si Gobernador Nilo P. Demerey, Jr., MPM, bag-o lang nga mitambong sa Regional Peace and Order Council nga gipahigayon sa Butuan City niadtong Pebrero 4, 2025.

Ang miting nagpunting sa pagtan-aw ug pagsulbad sa mga hinungdanon nga isyu nga may kalabotan sa kalinaw ug kaayuhan, uban sa tuyo nga magpabilin ang luwas ug seguradong palibot sa rehiyon. Ang mga miyembro sa mga ahensya ug mga Special Action Committees nagpresentar sa ilang mga report, lakip na ang report gikan sa Commission on Elections bahin sa umaabot nga National ug Local mid-term elections. Gibutang usab sa konseho ang mga kabalaka bahin sa mga suspetsosong tribo, sama sa Federal Tribal Group of the Philippines (FTGP), nga wala narehistro sa National Commission on Indigenous Peoples.

Dugang pa, ang konseho nagpasa ug resolusyon nga nagpasidungog sa Gawad Kalinga (GK) tungod sila nahimong awardee sa regional ug national nga lebel sa ilang epektibong Third Party Monitoring (TPM) sa mga proyekto nga pinondohan sa DILG.

Nihangyo usab si Governor Demerey ngadto sa konseho sa pagmugna ug usa ka informative campaign nga pwede mapasalida sa mga bus o sa bisan asa aron ipasiugda ang kampanya batok sa mga kriminalidad.

Sa pag-apil sa nagkalain-laing mga ahensya nga myembro, gihisgutan sa konseho ang mga estratehiya aron mapadayon ang kalinaw ug kahimtang sa kahusay sa rehiyon. Ang miting nagpakita sa komitment sa konseho sa pagsiguro sa kaluwasan ug seguridad sa Rehiyon sa CARAGA.